Monday, December 21, 2009

සිංහල බ්ලොග්කරුවන් ගේ සුහද හමුව.

දහනම (19) වෙනිදා උදේ නැගිටිනකොටම තිබ්බේ හිත ඇතුලේ මොකක්දෝ නොසන්සුන් ගතියක්. මොහොතකට එව්ව ඔක්කොම අමතක කරලා දාලා මගේ මූණත්තහඩුව හෝදාන කරගෙන යන්න ලැහැස්ති උනේ ටික කාලයකට ඉස්සර ත්‍රෙඩ් අස්සේ විකුම්පාපු අවස්ථාවකට සහභාගිවෙන්නයි. ඒ සිංහල බ්ලොග් කරුවන්ගේ සංගමයේ පලමු සුහද හමුවට සහභාගි වෙන්නයි.

Friday, November 20, 2009

ලෝකාස්වාදිකාවෝ වනාහි...,


තිහාසයේ ලිංගික ක්‍රියාවලීන් ගැන නොයෙක් විට ජනකතා, ප්‍රවාද, මතවාද හා ලියැකියවිලි වල හඳහන් වේ. කෙසේ වෙතත් ලෝකාස්වාදන ක්‍රියාවලීන් යනු [ලිංගික ක්‍රියා] පවතින සමාජය තව දුරටත් පවත්වා ගෙන යෑමට උවමනා වෙන අවශ්‍යතාවෙකි. අනුරාධ පුර යුගයේ ජීවත් වූ කුමාරදාස රජු ඉන්දියාවේ ජීවත් වූ කාලිදාස නම් කවියා හා මිතුදමින් බැඳීසිට ඇත.ඒ දෙදෙනාම කවියන් වූ නිසා ම ය. දෙදෙනා අතර ඇති මිතු දම කොතරම්ද යත් කාලිදාස හා කුමාරදාස දෙදෙනාම එකම ගණිකාව කරා ගොස් ඇති බව කියැවේ. ඇගේ කුටියේ කුමාරදාස ශ්ලෝකයක් ලිව්වේය. අවසන් දෙපදය ලියූ කෙනෙකුට තෑග්ගක් දෙන බව පවසන ලදී. කාලිදාස කවියේ අවසන් දෙපදය පූර්ණ කරන ලදී. නමුත් කුටිය ඇති නිවසේ ගහැණිය තමා එය සම්පූර්ණ කල බව කුමාරදාස රජුට කීය. එනමුත් මේ බව විශවාස නොකල රජ මේ ගැන සොයා බලන විට කාලිදාස කවියාව මරාදමා ඇති බව දන ගන්නට ලැබිණ. මේ ගැන සොවින් සිටි කුමාරදාස රජු චිතකය ට පැන දිවි නසා ගත්තේ ය. මේ ගැන පැරකුම් සිරිතේ " කුමරදස් රජ කාලිදස් නම් කිවිඳුහට තම දිවි පිදී " යනුවෙන් සඳහන් වේ..!

Monday, September 14, 2009

හෙළබසේ උප්පත්ති මූලය සොයා යෑම.

123
   එක් බසක් උපදින්නේ තවත් බසක් දෙකඩ වීමෙනි. මාලදිවයිනේ අද භාවිතා වෙන "සදිවෙහි බස" උපන්නේ සිංහල බස දෙකඩ වීමෙනි. එසේම සිංහල බස උපන්නේ ඊට කලින් භාවිත වුනු බසක් දෙකඩ වීමෙනි. සිංහලයේ උපතට මූලාශ්‍ර වූ මේ බස කුමක් ද? එය ඉන්දියාවෙහි භාවිතා වුණු එකක් ද?
       සිංහල බසේ උපතට හේතු වුණු ඉන්දියානු බස නැගෙනහිර ඉන්දියාවේ භාවිත වුණු වංග බස යැයි බොහෝ වාග් විද්වත්හු අනුමාන කරති. ඊට හේතුව මහාවංශය වැනි වංශ කතා වල එන එකතරා පුවතකි. ඒ අනුව වංග රටින් පිටුවහල් කරනු ලැබූ පිරිසක් අහම්බෙන් මෙන් මේ දිවයිනට සේන්දු වූහ.

Saturday, August 8, 2009

විවේක නැති තරුණ හිතට බෙහෙත් තෙල් බිංදුවක්...!

123

"පහුගිය දවස් වල තිබ්බ කරදර නිසා ඔලුව නිකං යකාගේ කම්මල වගේ. හිතට කිසිම නිදහසක් නෑ. අනේ මංදා. කොහොමට හිටපු කොල්ලෙක්ද? අද මෙහෙම පිස්සෙක් වගේ කල්පනා කරන්නේ... "

මෙහෙම එක පාරටම කිව්වාම, ඔබ බය වෙන්න එපා. මම මේ කියන්න යන්නේ අද කාලේ හැම තරුණයෙකුටම වාගේ තියෙන ගැටලු ටිකක් ගැන. ඒ තමා හිතට කිසිම දේකින් නිදහසක් නොමැතිවීම. මාත් ඇතුලුව. ඇඟිළි ගනින්න ඇඟිළි තුඩු දහයක් තිබ්බත්. සියවරක් ගැන්නත් ගෙවෙන්නෙ නැති තව අවධානය යොමුකළ යුතු අංශ මුලට ආවත් ඒ අතරිනුත් මුලටම එන එකක් තමා මේ ප්‍රෂ්ණය. හරි.., අපි දැන් තියෙන පුංචිම තැනින් පටන් ගමු.

ඇයි අපිට මුදල් අවශ්‍යය...?
"හරියට හරි.....!  හිතනවා නේද ඇයි මුදල් අපේ ජීවිතේ ට ඕනි කියලා..! තව හිතන්න...! මේ මොහොතේ ඔබ හිතන දේ තුල පෙර නොතිබූ අවශ්‍යතාවන් පෙනී.., ඇයි අපිට මුදල ඇත්තට ම අවශ්‍යය කියා පෙනෙන්නට ගනීවි. "
ඉතාම සරළව කිව්වොත් අපිට සල්ලි උවමනා වෙන්නේ "ජීවත් වෙන්න". ඊට පස්සෙ තමා අනෙක් උවමනා හා අවශ්‍යතා ඔතනට ආදේශවන්න පටන් ගන්නේ.
"ඇඳුම් පැළඳුම්, යානවාහන, කෙල්ලෝ" මේ ආදී එකී නොකී උපයෝගිතාවන් අපේ ජීවිතය අවශ්‍ය වෙන්නේ ඇයි..? ජීවිතය ඉදිරියට පවත්වාගෙන යාමට ඉහත කී අයිතමය [මුදල්] දැඩිලෙස අවශ්‍ය බව.., අපටත් හොරා අපේ යටි හිත අදහන්නට පටන් ගෙන තියෙන නිසයි.

ඉන් අපට මිදෙන්න බැරිද?
ඇයි බැරි..? පුළුවන්.. යම් තරමක ට. නිදසුනක් විදියට අපිට වඩා [සමහර] පැවදි උතුමෙකුට මුදල් වැයවෙනවා අඩුයි. ඒ උන්වහන්සේලා ඔවුන්ගේ ජීවිත හැඩගස්වා ගෙන ඇත්තේ එක්තරා රාමුවක් ඇතුලත නිසයි. මේ ලියමන ලියන මාහටත් ඒ උක්ත උපයෝගිතාවන් ගෙන් මිදෙන්න බැරි උනත් මම හොඳට ම දන්නවා ඉන් මිදුනු ජීවිතය ඉතා නිදහස් වග.

චිත්‍ර ශිල්පීන් යුවළක්
මීට කලකට පෙර මට හමුවූවා මුදල් වලට යට නොවී ජීවිතය ස්වයං පෝශිත කරගත් චිත්‍ර ශිල්පීන් යුවලක්. ඔවුන්ගේ ජීවිතය ඉතා නිදහස්. ඔවුන් දෙපළත්, දරු දෙදෙනාත් ජීවත් වන්නේ., ශ්‍රී පාද හිමය [වනය] ආසන්නයට වන්නට නිවසක් සාදාගෙන. ජීවිතය ගෙනයන ඔවුන් දෙපල ට ඇත්තේ ඉතාමත් අල්පේඡ්ඡ දිවිපෙවෙතක්. ඒ වුනත් නව්‍ය තාක්ෂණය හා තොරතුරු ලබා ගැනීම අතින් ඔවුන් අපටත් වඩා යාවත්කාලීන යැයි කියන්නට පුලුවන්. අනෙක් වැදගත් ම දේ තමා ඉහත පවසන්නට යෙදුනු දෙපළ 100% ආදායම ලබාගන්නේ චිත්‍ර හා මූර්ති නිර්මාණකරණයෙන් වීම. නිර්මාණයක් දෙකක් කර ඔවුන් ලබාගන්නා මුදල් ප්‍රමාණය අරපිරිමැස්මෙන් භාවිතා කර ඉන් සියලු අවශ්‍යතා ඉටුකර ගන්නවා.

එමනිසා අතේ තියෙන මුදල "සම්මා සතීයෙන්" [යහපත් සිහිබුද්ධියෙන්] යුතුව වියපැහැදම් කරනවා නම් මේ ගැටළු වලට මූණ පාන්නට වන්නේ නෑ. එමනිසා අප මුදල් වල වහලුන් නොවී මුදල් අපගේ වහලුන් කරගත යුතුයි.

කෙල්ලෙක්/කොල්ලෙක් එහෙම මේ වයසට ඉන්න ඕනි නේද..?
" ඔව් නේද..? හිටියත් හොඳා නොහිටියත්..., ඒත් හොඳා..., අනේ මංදා..! "
අපි මුලින්ම බලමු අපිට මේ වයසට කෙල්ලෙක්/කොල්ලෙක් හා සම්බන්ධතාවක් පවත්වා ගෙන යන්න අවශ්‍යය වන්නට හේතුවන ශාරීරික උත්තේජනයන් මොනවාද කියලා... මූලිකව ම, තරුණයෙකු/තරුණියක යොවුන් වියට පත් උනා ම හෝමෝන ස්‍රාවය වීම [තරුණියකට නම්  ඊස්ට්‍රජන් , තරුණයෙකුට නම් ටෙස්ටෙස්ටරොන්] අන් වයසට සාපේක්ශව ඉහල අගයක් ගන්නවා. මේ අනුව සිරුරේ ඇති ස්නායු පද්ධතියේ වන උත්තේජනයන් තම සහකරුවා හෝ සහකාරිය සොයාගැනීමේ ක්‍රියාවලියේ මූලිකම අඩිතාලම සපයනවා. ශරීරයේ ක්‍රියාවලිය මෙසේ වන විට, මීට අනුබල දෙන තවත් අංශයක් තිබෙනවා. ඒ බාහිර සමාජයයි. බාහිර සමාජය තුලින්ද අපට මානසික උත්තේජනයන් ලබාදෙනවා
උදාහරණ ලෙස..,


*තම සමවයසේ යහළුවන්ට එවැන්නන් සිටීම..
*යොවුන් වයසට පත් වීමේදී එවැනි සබඳතා සඳහා සබකෝලය මුසු වූ ආසාවක් [කිතියක්] පැවතීම..
*මිතුරන් තමන් ලද අත්දැකීම් යහලු යෙහෙළියන් හා බෙදාගැනීම්..
*එමනිසා තමන් හටත් උක්ත අත්දැකීම් ලබා ගැනීමට සිත්වීම..

මේ ආදී වූ විවිධ බාහිර හේතු කාරණා තරුණ සිත ඒ පිළිබඳව ඇද බැඳ තබා ගැනීමට හේතු වෙනවා.
"සඳ එලිය මෙන් අචින්ත්‍ය වූ ආදරයක් කරන, ලබන, යොවුන් කොටස් සිටීනම් ඒ ඉතා අල්පයි." බොහෝ තරුණ කොටස් වලට "තමා අනෙකාට ආදරය කරන්නේ ඇයි?" යන ගැටලුවට උත්තර දෙන්නටවත් හැකියාවක් නැතිතරම්. මම බොහෝ මගේ මිතුරන් ගෙන් මේ ප්‍රශ්ණය ඇසුවාම ඔවුන් සතුව  මා හට දෙන්නට තරම් ඍජු සාධාරණ පිළිතුරක් තිබුනේ නැහැ.


"නමුත් මතක තබා ගන්න. මා මේ කතා කරන්නට යෙදෙන්නේ ‍යෞවනයන් ගැන පමණයි. එසේ නැතිව නිසිවයසේ දී නිසි දේ  කරගන්නට නොහැකිව කාමාපචාර වල යෙදෙන අසහන්කාරී මැදිවියැතියන් ගැන නොවෙයි."

කෙසේනමුත් තමන් හට අනාගත සහකරුවෙක් සොයාගන්න උත්සහ කරනවා නම් මගේ මතයේ හැටියට,   තමා ගත් තීරණය.., ජීවිත කාලයට ම පසුතැවිලි නොවන්නක් විය යුතුයි. තවද, සහකරු/කාරියක් තෝරා ගන්නා අවස්ථාව වනවිට තමා හැරුණුකොට තවත් ජීවිත දෙක තුනක වත් බර දැරීමට අවශ්‍ය ශක්ති වපසරිය තමා සපයා ගත තිබිය යුතුයි. ඒ ජීවිත කාලය පුරාවටම ඔහුව/ඇයව තෝරාගැනීමේ දී.., ඔහු/ඇය හා විසීමේදී.., තමා වෙතට වගකීමෙන් හැමවිටම 50%ක කොටසක් පැවරී ඇති නිසාවෙන්.

ඉන් අපට මිදෙන්න බැරිද?
පුලුවන්. නමුත් ආසියාතික සමාජය තුල තනිකඩයින්ට හිමිවන්නේ අවම ඉඩක්. තරුණ වයසේ දී ඒ ඉඩ ඉල්ලුමක් [Demand] බවට පරිවර්තනය වුවත්.., කෙමෙන් කෙමෙන් මැදිවයසට ලංවන විට සමාජය ඔහුව/ඇයව ප්‍රතික්ෂේප කරනවා. මේ ප්‍රතික්ෂේපය නිසා පවතින සමාජයට වෛරකිරීමට පටන් ගන්නා ඔහු/ඇය, විවිධ ක්‍රියාවල යෙදෙමින් [හොඳ/නරක] තම සිත සුවපත් කර ගැනීමට වෙහෙසෙනවා.
මේ තත්ත්වය ආසියාව තුළ මෙසේ වුවත් යුරෝපීය රටවල වෙනස් මඟක් ගන්නවා. තමා ජීවිතය තුල තනිකඩව සිටීමට හේතු වුන කරුණු කාරණා සොයා ඒවාට ප්‍රතිකාර කිරීම එහි එක අවස්ථාවක් හැටියට පෙන්වා දෙන්න පුලුවන්.

වාහනයක් මේ වයසට තියෙන්නම් ඕනි...!
මගේ සමහර යාලුවෝ මේ වනකොට තමන්ගේ පළවැනි කාර් එක ගන්න හදනවා. තව සමහරුන්ට සා/පෙළ , උ/පෙළ සමත් වූවාට පසුව කාසිකාර දෙමවුපියන් විසින් වාහන අරන් දීපුවත් තියෙනවා. මොනා උනත් තමන්ට වාහනයක් තියේනම් තරුණ වයසේ දී උත්සහා කරන්නේ එය හැඩගන්වමින් ආකර්ශණයක් එකතු කරන්නටයි. තරුණ කොටස් කොහොමත් දන්නවා වාහනය වටිනා කමින් වැඩිවෙන්න වැඩිවෙන්න ලීටරේට වැඩකරන සැතපුම් ගාන තරමට ම සමහර විට ඊටත් වඩා වැඩිපුර කෙල්ලො/කොල්ලෝ වැඩකරන වග [හිකිස්] .

නමුත් අවාසනාවකට..,
ලංකාවේ වැඩිපුර සිටින්නේ මධ්‍යම පාංතිකයන් ගේ දරුවෝ [මා ද ඇතුලුව]. සමහර ඉහල මධ්‍යම පාංතිකයනට එවැන්නක් සඳහා ප්‍රාග්ධනය විතැන් කිරීමට හැකියාව තිබුනද, බොහෝ අඩු ආදායම් ලාභී කොටස් වලට එය සිහිනයක් බවට අද පත්වෙලා. මීට ඔවුන් ලබන ආදායම් තත්ත්වය පමණක් නොව රටේ ආර්ථිකය ද බලපානවා. ඒ ඔවුනගේ ආදායම් තත්ත්වය ට රටේ ආර්ථිකය මඟින් ඍජු බලපෑමක් එල්ල කරන නිසයි. වාහනයක් ගැන හිතීමේදී දහසක් පැති ගැන සිතන්නට වෙලා. සිය පවුල, මාසික වැටුප, දෛනික වියපැහැදම්, ඉතුරුම්, නිවාස රහිත නම් ගෙවල් කුලී, නිවාස සහිත නම් නඩත්තු වියදම් මේ ආදී එකී නොකී උපයෝගිතාවයන් ගැන සලකා බලන්නට වෙනකොට තමා අත සාධාරණ මුදලක් ඉතිරි නොවන තරම්.

වාහනයක් නැතුව ඉන්න ම බැරිද...?
ඉහත ගැටලු වලට දුන්න පිළිතුර මෙයටත් දෙන්න පුලුවන්. " ඇයි බැරි.., පුලුවන්" අපි වාහනයක් ගැන සිතන විට. අපේ යටිසිත නිතරම ඉතිරි 50% ගැනත් වාහන රහිත මනෝ ලෝකය ගැන සැලකිලිමත් වෙනවා. " ඇයි.., බස්, කාර් වෑන් පාරේ තියෙන්නේ " කොමියුනිස්ට් චින්තනය සාධාරණයි.. නමුත්.., තමන්ට තමාගේම කියා යම් දෙයක් තිබෙන විට ඒ පිළිබඳව ඔහු/ ඇය තුල ඇත්තේ ඒ පිළිබඳව අධිනිශ්චයක්. "මේ මමය, මගේය යන හැඟීම " හිතට ආවිට එය අන් අයට එහි හිමිකාරත්වය ප්‍රදර්ශණය කිරීමට වික්ටෝරියානු මානසිකත්වයක් උද්ගත වෙනවා.. මෙන්න මේ සිතුවිල්ල තමා වාහනයක් පමණක් නොව ඕනෑම දෙයක් ගනීමට ඉවහල් වෙනවා. සිතුවිල්ල ඒ පිළිබඳව සිතීම, චිත්ත රූප මැවීම මේ ආදිය ඔබ පිළිපැදීම තුලින් අවසන ඔබේ හිත විසින් එම අදාල දේ ඇති තැන සොයා පියමන් කරවයි.

හැමවිටම දෙවරක් සිතා බලන්න. ජීවිතේට අවශ්‍යනම් පමණක් ලඟා කරගන්න. එසේ නැතිව හේතුරහිතව ව ජීවිතයට ආලවට්ටම් දැමීමෙන් ජීවිතය නැතිනාස්ති කර නොගන්න. මක් නිසාද යත් මේ ගෙවෙන තත්පරයත් වියපත් කරන්නේ ඔබේ වටිනා ජීවිතය නිසාවෙන්.

.::Bohemian::.

Monday, August 3, 2009

මසැස , මනැස සහ තෙවන ඇස.

විවරණය..>
                      උප්පත්තියේ සිටම පවතින්නා වූද, උඩ, යට, වම හා දකුණ යන චතුර්විද ප්‍රදේශ වලට චලනය කල හැකි භෞතික දේ පමණක් පෙනෙන අවයවය "ඇස" හෙවත් මසැස නම් වෙයි. භෞතික දේ පමණක් පෙනෙන ඉහත පැවසි මේ අවයවය තුලින් පෙනෙන දේ තුල ඇති අරුත, විදග්ධ බව, ලාභාලාභ බව ගණනය කරණු ලබන්නේ,මන තුල පවතින ඇස හෙවත් මනැස තුලිනි. මනැසින් බලාගන්නා ලද තීරණ වැරදි නිවැරදි මත සහිත කෝවක බහා ඉන් අත්වන තීරණය චෛතසික වලට දැනුම් දී ඒ අනුව සිතද, සිතට අනුව ගතද ක්‍රියාකරවන අංගය තෙවැනි ඇස හෙවත් අදිසි හස්තය ලෙස නම් කල හැකිය.
demon-eye-by-treehouse-charms
"විටෙක නිවැරදි තීරණ හා වැරදි තීරණ ගන්නා මේ අංගාත්‍රය මනුසමාජය තුල හැම කෙනෙකුටම වාගේ ඇතත් මින් බොහෝවිට ප්‍රයෝජන ගන්නේ මසැසින් පමණි."

හරි දේ වැරදි දේ...>
මූලිකවම අප පිළිගත යුතු දෙයක් තියෙනවා. ඒ නම්..,අපට හරි කියා පෙනෙන දේවල තව කෙනෙකුට වැරදි වෙන්නට පිළිවන්. බොහෝවිට මෙහි කණපිට ද විය හැකියි. යම දුටුවිට මසැස, මනැස හෝ තෙවෙනි ඇස හෝ කුමකින් දුටුවත් හරි වැරදි කියා බෙදන්නට නොහකියි.

නිදසුන අංක 01

නිදසුනක් විදියට අපි " මිනිසෙක් බල්ලෙකුට ගහනවා දැක්කා "කියා සිතමු. අනිවාර්යයෙන්ම ඒ දේ වැරදීයි කියා ඔබ සිතාවි. නමුත් ඒ බල්ලාට ගැසූ මිනිසාගෙන් ඇසුවොත් ඒ ගහන්නට හේතුව, ඔහු කීවොත් " ඒ බල්ලා මාව කන්න පැන්නා " කියා.., එවිට කාගේ තීරණයද හරි..? කවුරුවත් අත නෑ නේද..? ඒ කියන්නේ ඒ දෙන්නම හරි. අපි පවු කිව්වේ ඒ මිනිසා බල්ලාට ගහනවා ගහනවා දුටුනිසා.. ඒත් බල්ලාට මිනිසා ගසා තිබෙන්නේ ඌ මිනිසාව කන්නට පැනපු නිසායි.

මේ තත්ත්වය අප වටා ඇති අනික් දේ වලටත් අදාලයි. මේ ලෝකේ සභ්‍ය හෝ අසභ්‍ය කියා දෙයක් නෑ. වෙනස තියෙන්නේ අප ඒ දිහා බලන විදිය අනුවයි. තිත්ත උනත් මේ සත්‍යය අපි භාරගත යුතුයි..!

නිදසුන අංක 02

කාන්තාවක් පිරිමියෙකු සමඟ මෛථුනය [ ලිංගික සංසර්ගය, ලෝකාස්වාදනය] සිද්දකරමින් සිටින පිංතූරයක් අපසතුයි කියා සිතමු. එය දකින සමහර අය කියන්න පිළිවන් " චිකේ මහ වල් පිංතූරයක්.., මට නම් බලන්නවත් බෑ.., මුං මේවා කොහොම බලනවාද මංදා " කියලා.., නමුත් සමහරෙක් කිව්වොත් "ෂහ් මාර කලාත්මකයි..! හරියට ඉන්දියාවේ මධ්‍ය ප්‍රදේශ් වල තියෙන කජුරාහෝ දේවස්ථානයේ කැටයමක් වගේ. මේ පිංතූරේ බැලුවහාම මට වත්ස්‍යායනගේ කාමසූත්‍රය මතක් වෙනවා. "

කාගේ හිතේද වල්කම හා හැදියාව බෙදෙන්නේ..? එහෙම වෙන්නේ අපි ඒ දිහා බලන විදිය අනුවයි. බලන්නට පෙර අපේ හිත් තුල තැම්පත් වී ඇති විවිධාංගී කරණය වූ " චිත්ත කසළ ගොඩවල් " අනුවයි.

ඒනිසා පෙනෙන හැම දේම සත්‍ය නොවේ..,සත්‍ය හැමවිටම පිටතට පෙනෙන්නේද නොවේ. පෙනෙන දේ තුල නොපෙනෙන..,නොපෙනෙන දේතුල පෙනෙන., දේට වඩා යථාර්තයක් තියෙන්නට පිළිවන්. එම නිසා අන්තවාදී නොවී මධ්‍යස්ථව තීරණයකට එළඹී සිත ජය ගන්න. හදවතට නොව මොළයට තැන දෙන්න.., මක්නිසාද., ආදරය උපදින්නේ හදවතේ නොව සිත තුළයි. සිත ඇත්තේ හදවත තුළ නොව මොළය තුලයි.

ඒනිසා මසැස , මනැස සහ තෙවන ඇස හරහා මොලයෙන් වැඩක් ගමු.

Sunday, July 26, 2009

හරිම ආදරේ හිතෙන රූප පෙළක්..

මට මේ රූප ටික ලැබුනේ email එක කින්.. කවුද..? කොහෙද? කාගේද කියලා තිබුනෙ නෑ. නමුත් තිබ්බ රූප ටික නම් හරීම ආදරවන්තයි. ලෝකේ කොහේ ඉපදුනත් පොඩිවුන් පොඩිවුන්මයි නේද කියලා හිතෙනවා.. මේ තියෙන අහිංසක කම බිංදුවක් හරි ඉතුරු වෙලා තියෙනවා නම් ලොකුවෙන කොට මේ දෙගිල්ලො ගාවම... බලන්න... හිතන්න..

දසපද්දුර ක්‍රියා හා රවිශෛලාශයින් ගේ විළි වැසූ සළු රීති...

ceylon copy අපි කුඩාකල අපේ මව් පියන් නිතර කියන වදනකි "දහපදුරාවී" යන්න. අනාචරයේ හැසිරෙන කාන්තාවන් ට සමහර උදවිය දහපද්දුරාවී යන්න භාවිත කළ බව පැරැන්නන් කියනවා අපි අසා තිබෙනවා... මෙහි මුල් උට්ඨානය සිදු වූයේ [රවිශෛලාශ]යක්ෂගෝත්‍රික සිරිත් විරිත් සමඟයි. ඒවාට පටහැනිව ක්‍රියාකිරීම දසපද්දුර ක්‍රියා නමින් හඳුන්වනු ලබනවා. නමුත් මේ වචනයේ අර්ථය දන්නේ අතළොස්සක් බව නම් නියතයක්..

Saturday, July 18, 2009

“අදහස්” - කියවන්නේ නැතුව කීයටවත් අතහරින්න එපා...!!!

idea book
මට ළඟදී මල්ලි කෙනෙකුගෙන් පොතක් ලැබුණා.. ඔහු මනෝවිද්‍යාව ගැන කුඩා කල සිට ම ඇල්මක් තිබුණු කෙනෙක්. පොතෙ නම "අදහස්". එය " Idea Book " හි පරිවර්තනයක්. පොතේ මුල් කතුවරයා "ෆ්‍රෙඩ්‍රික් හරේන්"[Fredrik Haren]..පොත සිංහලයට පරිවර්තනය කර තිබෙන්නේ, එම්.එච්.එම්. යාකූත් සහ ලීලා වික්‍රමරත්න විසින්. ඒවාගේම මෙය “interesting.org” ආයතනයේ ලාභය බලාපොරොත්තු නොවන ඉදිරිපත් කිරීමක්. පොත පෙරලද්දී අනෙක් සාමාන්‍ය පොතක් වාගේම වෙනසක් නොදැනුනත්.., පෙරවදනේ සිට දිගටම කියවාගෙන යද්දී.., මට දැනුනේ කියා ගත නොහැකි තරමේ ඓශ්චර්යක්.., මක් නිසාද කියනවා නම් මේ පොත ගැන මම මෙතෙක් කල් දරපු මත සියල්ලම පළමු පිටුව කියවනා විටම වාගේ බිඳවැටුණු නිසා.

Wednesday, July 8, 2009

කිචි කවාගන්න උවමනා නැත..!

අද මම මගේ පරණ ලාච්චුවක් අදිනකොට පරණ නැෂනල් ඉන්ක්වයර් සඟරා වගයක් හම්බ උනා. නිකමට වගේ කියවලා බලනකොට ලිපි අග පුංචියට තිබුන කතා ටික කියවලා බැලුවා. 1970 දී පලවූ සඟරා උනත් ඒ කතා වල “ටොක්ක” තාමත් හොඳට ඔලු වලට වදින්නේ කතාව තුල අපට හිතන්න දේවල් ඉතිරි කරල තිබෙන හන්දයි..
කෑමක් උනත් වැඩිය රස බෙදාහදා ගෙන කනකොට නිසා කතා වලින් ස්වල්පයක් ඔබත් එක්ක රස්තියාදුවේ යවන්න හිතුවා.

Wednesday, July 1, 2009

ලෝකුරු නයිදේ ගේ "හත් බොරු කවිය".

ලෝකුරු නයිදේ කන්ද උඩරට අවසාන රජුව සිටි ශ්‍රී වික්‍රම රාජසිංහ රජුගේ කවිකාර මඩුවේ සිටි මුඛරි කවියෙකි. රජතුමා කවියන් පිරිවරා සිටි විවේක අවස්ථාවල දී ඔවුන් ලවා කවි කියවා ප්‍රීති වීම සිරිතක් විය. නිතරම එකම කවි අසා හෙම්බත් වී සිටි රජතුමා කවීන් අතර තරඟයක් ඇතිකිරීමට සිතා ගත්තේය.

Tuesday, June 30, 2009

කයිලාසාවට පෙම් බැඳීම හෙවත් "Chaandan Main" ඇසීම.

මේ වියමන ඉන්දියනු සූෆී සංගීතය නවමු මාවතකට යොමුකළ Kailash Kher ගේ “Kailasa-Chaandhan Main”ඇල්බමය පිළිබඳව පෙරවදන කි.
KKCM
ඇසීමට නොහැකි තරම් කලබලකාරී මෑත කාලීන ඉන්දියානු සංගීත ලොව තුලින් කාලයකට පසුව මා හට කයිකාසාවන් ගේ "Chaandan Main" හමුවිය. කයිලාසා යනු තිදෙනෙකුගෙන් යුතු සංගීත කණ්ඩායම කි. [Kailash Kher, Naresh Kamath, Paresh Kamath] සමඟ ඔවුන් ගේ හතර වන ගීත සංහිතාව වන "චාන්දන් මේන්" මා ඇසුවනම ප්‍රභාශ්වරයට පත්විය. ඒ එතරම්ම අලංකෘත නිසාවෙනි. කයිලාසාවන් ගේ මෙයට ප්‍රථම ඇල්බමයන් වූ "ආවාර්ගී[Awargi], කයිලාසා [Kailasa]සහ ජූමෝ රේ[Joomoo re]" ට පසුව මා ඉහත පවසන්නට යෙදුන ඇල්බමය පසුගිය ජූනි 21දා නිකුත් විය. මේ වන තුරුත් ඉන්දීය ශාස්ත්‍රීය ගීත අතර මුල් ස්ථාන අත්පත් කරගෙන සිටින කයිලාසාවන් මෙයට පෙර ප්‍රසිද්ධියට පත් වූයේ "දේශද්වානියා [Deshadhwaniya]හා පර්නාලි[Parnali]" හි සංගීත අදියුරුවන් නිසා වෙනි.

Saturday, June 27, 2009

කාලය

කාලය මනින්නේ කොහොමද කියලා කෙනෙකුගෙන් ඇහුවොත් පැය විනාඩි තප්පර වලින් කියලා කෙනෙකුට කියන්න පුලුවන්.., නමුත් මම මෙහෙම කිව්වොත්, හොඳ කාලය, නරක කාලය කියලා එහෙම බෙදන්න බැරිද කියලා... උත්තරය...: ගැටලුවක් වෙන්න පුලුවන්..

Friday, June 26, 2009

වාසගම් - දන්නා දේ ගැන නොදන්නා යමක්.

         මූලිකවම වාසගම යනු පුද්ගලයෙකු ගේ නම අගට හෝ මුලට යෙදෙන, තමාව අයිති පවුලේ [පෙළපතේ] නාමයයි. [වාසගම යන වදන පවුල්නාමය යන පදයේ පර්යාය පදය ද වෙනවා.] එමෙන්ම වාසගම ලෙස බොහෝ විට යෙදෙන්නේ පිය පාර්ශවයේ නාමය වුවත්, අමහර සංස්කෘතීන් හි වාසගම ලෙස යොදන නාමය මාතෘනාමය ලෙස වෙනසකට භාජනය වෙනවා.
         පරණ අය තම වාසගම් විදියට භාවිතා කරගෙන තියෙන්නේ, තමා කරන රස්සාව එහෙමත් නැතිනම් ජීවන වෘත්තිය.  තවත් විදියට මගේ පෞද්ගලික අදහසට අනුව ඔය කුල මල වල මූලික කාරණයත් ඔය ඉහත කාරණාවම යි. තමන් ඉන්න ප්‍රදේශය අනුව, කල ජීවනවෘත්තිය අනුවත්, තම අයත් උන කුලයත් යන මේ මූලික කාරණා දෙක පදනම් කරගෙන තමයි, වාසගම් යනාදිය හැදී ඇත්තේ.
          සමහර අවස්ථා වල "චීන සංස්කෘතික කවයේ [Chinese Cultural Sphere]" තිබෙන [නිද: ජපානය, කොරියාව, ඉන්දුනීසියාව, තායිලන්තය, බුරුමය ආදී] රටවල් වල සමහර ජන කොටස් තමා දරන දේශපාලන මතය පෙන්වීමට දේශපාලනයේ සමහර සිවිල් චරිත වල නම් තම නම් අගට ඈඳා ගත් අවස්ථා තිබෙනවා.

රක්ෂාව අනුව: හෙට්ටිආරච්චි, චෙට්ටියාර්, අප්පුහාමි, මුදියන්සේ , Cooper, Smith [ Blacksmith, Silversmith, Goldsmith, Coppersmith etc] .
ජීවත් වන ප්‍රදේශය අනුව: පුවක් ඕවිට, ඉද්දමල්ගොඩ, කිරිඇල්ල, කිරිපෝරුව, Kingston.
කුලය අනුව: මනන්නලා ගේ, නැකතිගේ.

          වාසගම් වගේම භාවිතා වන නම් ගිහියන් නොව පැවිද්දන් අතර තමා හට පැවදි වන විට ලබාදෙන නාමයට ඉදිරියෙන් භාවිතා වෙනවා. එහිදී තමා උපන් ගම හෝ පැවදි වන විට ජීවත් ව උන් පලාත දැකිය හැකියි.
එල්ලාවල මේධානන්ද, ඇල්ලේ ගුණවංස, ගැටහැත්තේ සෝභිත ආදිය නිදසුන් ලෙස පෙන්වාදෙන්න ට පුලුවන්.

Tuesday, June 23, 2009

රාවණා

රාවණා කියන්නෙ කව්ද? ඉතිහාසය තුල රාවණා හට ඉතිරි වී ඇති හිඩැස, ඔහුට සත්‍ය වශයෙන් ම හිස් 10 [ඔලු 10ක්] සහිතව සිටියේද? දඬුමොණරය යනු කුමක්ද? මේ හැම දේම හා කස්සප අතර ඇති සම්බන්ධය කුමක්ද?... ඔය ආදී අති විශාල ගැටලු ගණනාවක් ඉතිහාසය තුල අපට විසඳා ගන්නට බැරිව තිබෙනවා.. සමහරවිට රාවණා යනු අතීත මනු ගති පිළිබඳ අපට ඉතිරි වී ඇති එකම මොඩලය වන්නටත් පුළුවන්.
මේ ලියමන, රාවණා හා කස්සප පිළිබඳ නිරීක්ෂන පත්‍රිකාවක් ලෙස යොදා ගන්නටත් බ්ලොග් හිතකාමී ඔබට මගෙන් කිසීම තහනමක් නෑ..

ඇත්තට ම රාවණා කියන්නේ කව්ද?rawanax

මනු රාජවංශය අවසාන වූවායින් පසුව, තවත් රාජ වංශ තුනක් ගැන ඉතිහාසයේ සඳහන් වෙනවා, ඒ පිළිවෙලින් තාරක [වසර 10,000 කට පෙර] මහාබාලි [වසර 7,500කට පෙර] රාවණා [වසර 5,000- කට පෙර] ආදී වශයෙනුයි. මේ තිදෙනා අතුරින් රාවණා පිළිබඳව පවතින තොරතුරු ඉස්මතුවන්නේ ඉන්දියානු සාහිත්‍යයේ සඳහන් වන රාවණා තුල පවතින තාක්ෂණික හා යුධ බලය නිසාවෙන්මයි. සාහිත්‍යයේ සඳහන් වන පරිදි, රාවණා හට හිස් දහයක් සහ අත් ගණනාවක් පවතිනවා යැය් කීමෙන් පෙනීයන්නේ, ඔහුතුල තිබූ විවිධාකාර දේ කිරීමට තුබූ නිපුණ තාවය වියහැකියි. එනමුදු අවසානයේ දී මේ තරම් දක්ෂතා තිබූ රාවණා රාමා ගේ [ ඔහු පිළිබඳව මම වෙනම තොරතුරු ගෙන එන්නම්] යටතට පත්වනවා... ඉන්දියානු ජනතාව "දීපාවලී" ලෙස සමරන්නේ අර ඉහත කියූ රාවණාව රාම ගේ යටතට ගැනීමයි.
[රාවණා රාම පිලිබඳව පවතින අරුමැසිවාදී සංස්කරණ අතුරින් වාල්මිකී ගේ රාමායනය ග්‍රන්ථය ප්‍රධාන තැනක් ගන්නවා.]

ආචාරිය ලාල් සිරිනිවාස් හා මිරැන්ඩෝ ඔබේසේකර යන මහත්වරුන් පවසන පරිදිරාවණා පිලිබඳ වූ ඉතිහාස හා භූගෝලීය තොරතුරු එක් රැස් කර බලන කල පශ්චාත් ඓතිහාසික පුරාවිදු සංධිස්ථානයක් වන සීගිරිය යනු.., මීට ශත වර්ශ 50 කට ඉහත දී සාදන ලද රාමායනයේ එන රාවණා ගේ පියරජතුමා වූ කුවේරයා විසූ ආලකමන්දාව ද? යන ගැටළුව මතු කරනවා.

ධූරාවලිය
පොළොන්නරුවේ සිටියා යැයි කියන මහාරිශි පුලස්ති ගේ මුනුපුරා වූ කුවේර ගේ පියා වෙසමුණි යනු මහාරිශි පුලස්ති ගේ වැඩිමහලු දරුවා විය. කුවේර යනු වෙසමුණිගේ පළමු විවාහය වූ බ්‍රාහ්මීන් ගේ රූමත් දියණියක වූ ඉල්ලාවිලා දේවිය ගේ දරුවා විය. පසුව වෙසමුණි ගේ දෙවැනි විවාහය ලෙස කේශිණී පත්විය. කේශිණීට වෙසමුණි ට දාව දරුවන් පස් දෙනෙකු ලැබිණි. ඔවුන් රාවණ, විභීශණ, කුම්භකර්ණ, හේම සහ පුෂ්පික නම් විය.
කාලය ගත වෙත්ම කුවේර, තම පියරජතුමා වූ වෙසමුණි ගේ අභාවයෙන් පසුව සාමකාමීව රට පාලනය කලේ ය. මේ අතර කුවේරගේ දෙටුසහෝදරයා වූ රාවණා තම බලවත් කම ඉහළ යත්ම, ලංකා රාජ්‍යය පිළිබඳ ව සිත් පහළ විය. පසුව, රාවණා ලංකා රාජ්‍යයත්, එහි පිහිටි "ආලකමන්දාවත්", කුවේරගේ අහස්යානය වූ "පුෂ්පිකයත්" තමාට අවැසි බව දැන්වීය. මින් ඉතා කෝපයට පත් වූ කුවේර, රාවණාව ඉහත යෝජනාව ද ප්‍රතික්ෂේප කර පලවා හැරීය. එනමුදු ලෙහෙසියෙන් පරාජයට පත් වන්නට තරම් ලාමක නොවූ රාවණා ස්වකීය ඥාතීන් වූ ‍යක්ෂ ගෝත්‍රිකයන්ව කුවේරට විරුද්ධව මෙහෙයවා ලංකා රාජ්‍යය සියතට ගැනීමට සමත් විය.තවද කුවේරගේ ධනය, මාළිගය සහ අද දඬුමොණරය ලෙස හැඳින්වෙන " පුෂ්පිකය" ද සියතට ගන්නට සමත් විය.

සිවු හෙළය
සමහර ප්‍රකෘතිමත් අතීත වාර්තා පවසන පරිදි., සිංහල ජාතියෙහි උපත සිදුවී ඇත්තේ ප්‍රධාන පෙළපත් හතරක් මුල් කරගෙනයි., ඒ යක්ඛ, නාග, දේව සහ ගන්ධබ්බ යන සිවු පෙළපතයි. තවද ඉහත කී සිවු පෙළපත පැවත එන්නේ මහාරිෂි පුලස්තිට ස්ගෝත්‍රීයව යි. එනයින් ගත්කල සිවුහෙළය යනු හිරු දෙවියන්ට වැදුම් පිදුම් කල එකම රටක එක කොඩියක් යටතේ පාලනය වූ රාජ්‍යයක් බව නොරහසක්. තවද., හිරු සඳු සහිත රාවණ කොඩිය ලංකාවේ පැරණිත ම කොඩිය වනවා. දැනට පවතින සිංහ කොඩි සංකල්පය මෙරටට ආවේ මෙයට ශතවර්ශ 25 කට පෙර පැමිණි විජය කුමරුන් සමඟිනුයි.

රාවණා බලයට පැමිණි වහාම, ඉදිකලා යැයි කියන තම මවුපියන් [වෙසමුණි හා කේෂිණී] සිහිකර තැනූ දෙවොල, අතීතයේ මලවුන් වන්දනාව යක්ඛ ගෝත්‍රය තුල තිබූ බවට සලකුණක් ලෙස හඳුනා ගන්නට පිළිවන්.මේ දෙවොල පන්ඩුකාභය රජ දවස බොදු ආගමික ස්ථානයක් බවට පත් කල බවට සැළකෙනවා. පන්ඩුකාභය රජු යනු, යක්ඛ ගෝත්‍රය පිළිබඳ විශේෂ සැලකිල්ලක් දැක්වූ රජ කෙනෙක් බව ඉතිහාසයේ සඳහන් වෙනවා. මෙම ස්ථානය අද වන විට “ඉසුරුමුණිය” ලෙස හඳුන්වන බව සඳහන්..

චිත්‍රකූටද? ආලකමන්දාවද? සීගිරියද?
රාවණා වත නැමති පුස්කොළපොතට අනුව සීගිරියේ සැකසුම් ශිල්පියා වන්නේ "මායා දන්නාව" නමැත්තායි. හෙතෙම සීගිරිය තනන්නට යෙදුනේ රාවණා ගේ පියා වූ විස්තවාස රජු [වෙසමුණි] ගේ නියෝග පෙරදැරි කරගෙනයි. එකල සීගිරිය, ආලකමන්දාව නමින් හැඳින්වූ අතර කුවේර රජ සමය එය හැඳින්වූයේ චිත්‍රකූට නමිනුයි. පසුව, රාවණාගේ අභාවයෙන් පසුව "විභීශණ" රජකමට පත් වූ අතර හෙතෙම තම රාජධානිය කැළණියට ගෙන ගිය අතර ආලකමන්දාව ට විභීශණගේ ඥාතියෙකු වූ යක්ඛ වංශාධිපතියෙකු වූ චිත්තරාජ තම වාස භවන ලෙස යොදා ගත් බව එහි සඳහන්. තවද, චිත්තරාජ යනු පණ්ඩුකාභය කුමරු [ක්‍රි.පූ.437-367] හට රජකම ලබාදෙන්නට උපකාර කල අයගෙන් කෙනෙක්, ඒ පණ්ඩුකාභය කුමරු ගේ දෙමාපියන් යනු චිත්තරාජ ගේ වංශයෙන් පැවතෙන්නන් වූ බැවින්.
තවද, රාවණා වතෙහි කියැවෙන ලෙසට,පණ්ඩුකාභය රජ දවසින් පසුව ධාතුසේන රජුගේ පුත්‍රයා වූ කස්සප කුමරු තම වාසභවන ලෙස චිත්‍රකූටය ලෙස තෝරාගත්තේ ඔහු ගේ මව යක්ඛ ඇදහිලි විශ්වාස කරන්නියක් වූ බැවින් හා ඇය ද ඉන් පැවතෙන්නියක් නිසාවෙන්. කස්සප රජු යනු චිත්තකූටය රාවණා කල අයුරින්ම ප්‍රතිසංස්කෘත කල හා පවත්වාගෙන ගිය එකම රජතුමා ද වෙනවා.චිත්තකූටයේ [පසුව සීගිරියේ] ඇති ලෝපසිඳු බිතුසිතුවම් වලින් දැක්වෙන්නේ සිවුහෙළයත් එහි ඇති නිල්පැහැති කාන්තාරූපයෙන් පෙන්වන්නේ යක්ඛ ගෝත්‍රය බවත් අනෙක් කාන්තා රූ වලින් දැක්වෙන්නේ නාග, දේව සහ ගන්ධබ්බ යන ගෝත්‍ර වල නියෝජනය බවත්, අලංකෘත මල් වලින් දේශයේ එකමුතු බව පෙන්වන බවත් රාවණා වතෙහි සඳහන්.

සෝපානය හා පුෂ්පිකය [දඬුමොණරය]

තවත් එක් විශේෂ කාරණාවක් වන්නේ චිත්තකූටය යනු දැවයෙන් නිර්මිත සෝපානයක් ඉහල සිට පහලට ක්‍රියාකර වූ සිරිලක එකම බලකොටුව ද වෙනවා.සිංහ කට අසල සිට ඉහලට විද නිර්මිත කුහරය තුල මේ දැවයෙන් නිර්මිත සෝපානය දිනපතා සේවයේ යොදවාගත් බව සඳහන්.

පුරාවිද්වතුන්, ඉතිහාසඥයින් උපකල්පනය කරන ආකාරයට දඬුමොණරය, හිමාලයෙන් ගෙන එනලද සැහැල්ලු දැවයෙන් නිර්මාණය කරන්නට ඇතිබව සඳහන්. තවද, සීගිරිය වටා එහි රූප පන්සියයක ට අධික ප්‍රමානයක් චිත්‍රණය කරත් ස්වාභාවික හේතූන් මත කාලයත් සමඟ ඒවා මැකීගොස් ඇතිබව කියැවෙනවා. තව ද රාවණා යනු වෙදකමෙහි මෙන්ම කලාවේ ද කෙල පැමිණියෙකු වන නිසා ඔහුට හිස් දහයක් හා අත් විස්සක් ඇතැයි කීමට හේතුවක් කරගත්තා ද වන්නට පුළුවන්.

කුමක් උවත් රාවණා හෝ කස්සප නිසා හෝ චිත්තකූට හා ආලකමන්දාවෙන් හැඳින්වෙන සීගිරිය ලොව පැරණිතම බලකොටු මාලිගාව වීම වලකන්නට නම් බැහැ.

.::Bohemian::.

පැන්සල.., ඔබට, මට, ජීවිතයට, දෙන පාඩම්…!

පැන්සල දෙන නිදසුන්   එය ඔබට, මට, ජීවිතයට, දෙන පාඩම්

පළමු උපදේශය.[01]
පැන්සල හැමවිටම තමාව හසුරවන ඇඟිලි වලට අනුකූලව හැසිරෙන්නට සූදානමින් ඉන්නවා.

 

ජීවිතයට දෙන පාඩම.
ඔබට මොනතරම් දේ කලහැකි උනත්, හැමවිටම ඔබව මෙහෙයවීමට සුදුසු කෙනෙකුට බලවේගයකට ඉඩදෙන එක....අපගේ ආගමික විශ්වාසයන් ට අපෙ ජීවිත හැඩගස්වන්නට ඉඩදෙන්න ට පුරුදුවන්න.

දෙවන උපදේශය[02]
අප ලියන අතරතුර පැනසල වරින්වර උල් කරගන්නවා. ඊට පසුව එය වඩාත් තියුණුව වඩාත් උද්යෝගිමත් ව ලියැවෙනවා...

 

ජීවිතයට දෙන පාඩම.
කරදර.., කම්කටොළු..,බාධක.. මේ හැමදෙයකින්ම කොපමණ පීඩාවක් ලැබුනත් ඒ හැම පීඩාවකින් පසුවම වඩාත් උද්යෝගිමත්ව සාර්ථකව, නැඟීසිටින්න ඉගෙන ගන්න

තෙවන උපදේශය[03]
පැන්සල එය අතින් වූ අඩුපාඩු, වැරදි, මකාදමන්නට ඉඩ දෙනවා..

 

ජීවිතයට දෙන පාඩම.
තමා අතින් වෙන වැරදි පිළිගන්නට නිහතමානී වන්න..,එය කිසිසේත් ම පරාජයක් ලෙස හිතන්නට එපා.,නිවැරදි කිරීම.., එයට ඉඩතැබීම සැමවිටම අපව සාර්ථකභාවයේ යුක්තියේ මාර්ගයේ යාමට උදව් වනවා..

සිව්වන උපදේශය[04]
පැන්සලයේ වටිනාම කොටස පිටතින් පෙනෙන අලංකාර ලී පතුරු කොටස නොවෙයි..,එහි අභ්‍යන්තරයේ ඇති අඳුරු මිණිරන් කොටසයි.

 

ජීවිතයට දෙන පාඩම.
ජීවිතයේ බාහිර වැඩි අලංකාරයට නොරැවටී.., එහි අභ්‍යන්තරයේ ඇති හරය සොයායන්න..

පස්වන උපදේශය[05]
පැන්සල හැමවිටම තමා කතා කරන දේ පිළිබඳ සටහනක් ඉතිරි කරනවා

 

ජීවිතයට දෙන පාඩම.
අප කරන හැම දේකින් ම අවසානයේ ඉතිරි වන්නේ හොඳ හෝ නරක පමණයි..,ඒ බව සිහි තබාගෙන කටයුතු කිරීමෙන්, කරන, කියන හැම කටයුත්තකදී ම වඩා අවධාරණයෙන්.., සාර්ථකව වැඩ කටයුතු කරගෙන යාමට අපට හැකියාව ලැබෙනවා...

මම,
Bohemian

Sunday, June 21, 2009

සිතුවිළි මිටියක් හිතට කඩා වැටීම.

මම පහු ගිය දවස් ටිකේ මගෙ කවි කොලේ ට ඔලුව දාගෙන හිටපු හන්දා බොහීමියන් ගැන බලන්ට බැරි උනා. සමාව භජනය කරනවා එයට.. පහු ගිය දවස් මගෙ හිතට තද දොම්නසක් එකතු වෙච්චි කාලයක්, මම ඒ ගැන පස්සෙ කියන්නම්.
මුලු දවස් ටිකේ ම කලේ බොහීමියාවේ[මේ පිටුව්වේ තිබ්බ] කවි වලට මගෙ ලිෂ්විෂ් බ්ලොගයට ට්‍රාන්සර් එකක් දුන්න එකයි, ට්විටරයක් හදාගෙන බූට් සින්දු ලිය ලියා හිටපු එක. බින්කුයි, උපුල් මහත්තය එක්ක කත කරනව ඇරෙන්න මෙලෝ වැඩක් කලේ නෑ. අනේ මංද මට මොනා වෙලාද කියලා...
[ මට කරුණාකරල ටික කාලයක් දෙන්න මගෙ ඔලුව හදාගන්න, සිතුවිළි මිටියෙන් තදට ඔලුව ට ගැහුවාම දරා ගන්න හරි අමාරුයි... ඒකයි..]

මම,sleep
Bohemian

Tuesday, April 28, 2009

පළවෙනි කතාව.


ඔලුවට එන අදහස් මෙ දවස් වල මහා කමකට නැති ඒවා අප්පා.... කවියක් ලියලා බ්ලොග් එකේ දාන එක අරෙන්න මේ ලෝකෙ වැඩක් කලේ නැහැ, දවස් ගානක ට. අම්ම ට පෙන්නන්නත් බැහැ ලියන කවි, ඇයි අම්ම ල දන්නෙ හතර පද කවි නෙ. එලිසම, එලිවැට නැති, නූතන පරපුරේ කවි දන්නෙ නැහැනේ.දවසක් මම ලියපු කවියක් මේසෙ උඩ තියෙනව දැකල ඒක කියවල අම්ම කියනව මරු රචනාව ලු. මට නේද? පොලොව පලාගෙන යන්න හිතුනා.
හිතට එන ඒව පිටකරගන්න ක්‍රමයක් තියෙන්නත් ඕන හන්ද මම මගෙ හිතේ තියෙන දේවල් මගෙ blog කොල වල වෙන්දේසි දානව.මෙතැන ඉඳන් කතා කරන්න පටන් ගන්න මගෙ කට කැඩිච්ච නාහෙට නාහන නිදහස් කතා ටික.....

එහෙනම් මම කැපුනා !

මම,
Bohemian