සමහර චිත්රපට බලලා ඉවර වුණාම අපිට කතාව අමතක වෙනවා. තවත් සමහර චිත්රපට බලලා ඉවර වුණාම අපිට එහි චරිත මතක හිටිනවා. නමුත් ක්රිස්ටෝපර් නෝලන්ගේ චිත්රපටයක් බලලා ඉවර වුණාම වෙන්නේ වෙනම දෙයක්. කතාව ඉවර වුණත්, සිතුවිලි ආරම්භ වෙන්නේ එතැනින්.
ඔබ Memento බලලා තිබෙනවා නම් මතකය ගැනත්, The Prestige බලලා තිබෙනවා නම් කැපවීමේ මිල ගැනත්, Inception බලලා තිබෙනවා නම් සිහිනය සහ යථාර්ථය අතර සීමාව ගැනත්, Interstellar බලලා තිබෙනවා නම් ආදරය, කාලය සහ විද්යාව ගැනත් නැවත නැවත හිතලා ඇති. Dunkirk තුළ යුද්ධයේ බියත්, Tenet තුළ කාලයේ ප්රතිලෝම ගමනත්, Oppenheimer තුළ විද්යාව සහ සදාචාරය අතර ඇති ගැටුමත් ඔහු ප්රේක්ෂකයාට පෙන්වන්නේ සරල පිළිතුරු ලබාදෙන්න නොව, ප්රශ්න අසන්නයි. ඒ තමයි නෝලන්ගේ සිනමාවේ අනන්යතාව.
ඔහු CGI මත අධික ලෙස රඳා නොසිටින අධ්යක්ෂවරයෙක්. හැකි තරම් සැබෑ සටන් දර්ශන, සජීවී දර්ශනතල තුල නිමැවූ පිපිරීම් දර්ශන, සැබෑ ස්ථාන, IMAX කැමරා සහ ප්රායෝගික දෘශ්ය ප්රයෝග භාවිත කරමින්, ප්රේක්ෂකයාට “චිත්රපටය බලනවා” කියන හැඟීම වෙනුවට “චිත්රපටයේ කතාව ඇතුලේ ජීවත් වෙනවා” කියන අත්දැකීම ලබාදීමට ඔහු උත්සාහ කරනවා.
ඒ වගේම ඔහුගේ කතා බොහෝවිට රේඛීය නොවන ආකාරයට ගලා යනවා. කාලය ඔහුගේ චිත්රපටවල චරිතයක් වගේ. සමහර වෙලාවට එය ඉදිරියට යනවා. සමහර වෙලාවට පසුපසට යනවා. තවත් වෙලාවට එකම මොහොතේ දිශා කිහිපයක ගමන් කරනවා.
මේ සියල්ල නිසා නෝලන්ගේ චිත්රපට මට නම් එක වරක් බලලා සම්පූර්ණයෙන් තේරුම් ගන්න අමාරුයි. ඒවා නැවත බලන්න හිතෙනවා. හැම වතාවකම අලුත් දෙයක් සොයාගන්න පුළුවන්.
1998 වසරේ Following සිට 2023 දී Oppenheimer දක්වා, ඔහු අධ්යක්ෂණය කළ චිත්රපට 12ම ලොව පුරා එකතුව ඇමරිකානු ඩොලර් බිලියන 6.7කට වැඩි Box Office ආදායමක් උපයා තිබෙනවා. The Dark Knight සහ The Dark Knight Rises බිලියනය ඉක්මවූ අතර, Inception, Interstellar, Dunkirk සහ Oppenheimer වැනි චිත්රපට වාණිජමය වශයෙන් මෙන්ම විචාරකයන් අතරත් දැවැන්ත සාර්ථකත්වයක් අත්කර ගත්තා.
විශේෂයෙන් Oppenheimer ඔහුගේ වෘත්තීය ජීවිතයේ තවත් සන්ධිස්ථානයක් බවට පත් වුණේ, ලොව පුරා ප්රේක්ෂකයන්ගේ ආදරය දිනාගැනීම පමණක් නොව, හොඳම චිත්රපටය සහ හොඳම අධ්යක්ෂවරයා ඇතුළු ඇකඩමි සම්මාන රැසක් දිනාගැනීමත් සමඟයි. ඒ නිසා ඔහු හොඳ අධ්යක්ෂවරයෙක් පමණක් නොවෙයි. ඔහු සිනමාව භාවිත කරමින් දර්ශනය, විද්යාව, මනෝවිද්යාව සහ මානව හැඟීම් එකම තිරයක සංවාදයට ගෙන ආ කලාකරුවෙක්.
ඔබට නෝලන්ගේ චිත්රපටයක් බලන්න වෙලාවක් ලැබුණොත්, එය කතාවක් ලෙස විතරක් බලන්න එපා.
ඔබේ මනසට අභියෝග කරන අත්දැකීමක් ලෙස විඳින්න.